今晚西甲獨腳戲，4哥西維爾主場硬撼畢爾包。西維爾仍有機會爭標，戰意遠勝已經散曬嘅「巴斯克雄獅」，挾近8場聯賽7勝之氣勢，有力再下一城，主勝有計。

季尾波戰意行先，勢估唔到今季西甲爭冠形勢咁緊湊，隨住馬德里體育會、皇家馬德里、巴塞隆拿輪流失分，令原本冇乜機會嘅西維爾，重燃希望，佢哋自從歐聯出局后專心打聯賽，打出一段8仗7勝1和嘅強勁勢頭，狂搶22分，依家落后榜首馬體會6分，但打少1場，不容忽視。

唔單只中場奧甘波斯傷愈復出后極速上力，前鋒安尼斯利呢8仗入咗4粒，重拾射門鞋。此外，西維爾不嬲靠主場搵食，單計聯賽，近10仗主場豪取9勝1負，喺自己地頭出擊零舍醒神。

相反，畢爾包上月連番受打擊，繼今年打番上屆西盃決賽輸畀死敵皇蘇后，今屆西盃決賽又慘吞巴塞4蛋，連輸兩場王者之戰，又冇降班危機，爭下屆歐洲賽資格機會一般，冇乜戰意之下，班波已經散散哋。「巴斯克雄獅」近8仗聯賽只得1勝6和1負，加上進攻核心蒙尼恩受傷，實難與氣勢如虹嘅西維爾相提并論，寧買當頭起，主勝捧得過。