今晚意甲重頭戲，由拉素主場迎戰國際米蘭，上季亞軍國米迅速上力，開季兩戰全勝合共轟入5粒，回巢嘅盧卡古表現勇猛。

雙方近6次對賽國米5次上半場領先，一于博半場客勝。

國米今季向車路士借回盧卡古，效果立竿見影，呢位比利時鋒將首輪聯賽開波唔夠兩分鍾就入波，協助球隊以2比1擊敗萊切。國米上仗再以3比0輕取史柏斯亞，盧卡古雖然冇入球，但佢上半場助攻拍檔拿達路馬天尼斯破網，自己亦有一次頭槌攻門中楣，踢法非常具侵略性，預料拉素防線難以招架。

事實上國米踢法搶韁，開季連續兩場聯賽上半場領先，加上主帥施蒙尼恩沙基曾經執教拉素5年，熟曬對手套路，預料可以制定針對性部署，爭取盡快打開紀錄。

拉素狀態靠唔住

拉素狀態較為起伏，首仗主場對博洛尼亞，上半場已經落后，直至比賽中后段先至連入兩球反勝2比1，但上仗只能同拖連奴悶和0比0，無論士氣及狀態都比唔上國米，睇嚟半場都捱唔到，半場客勝好路。