軍情　　愛華頓剛戰靠新兵中堅及翼鋒杜韋麥尼爾各入一球，作客贏波而回；但領隊林柏特賽後先點名稱讚傷癒復出、今屆首次在英超擔正的右閘老將史密斯高文，臨危授命，交足功課。正選門將比克福特同場傷癒復出，而新星「10號」安東尼哥頓該仗只列後備，今場應會正選出場，跟射手馬奧尼全力攻堅。

曼聯上仗聯賽在一個「災難性」的上半場，在0比4落後下，到下半場才稍有起色，並由兩個「安東尼」入波，合共回敬對手3球，算是挽回一點面子。領隊坦哈格批評球員該仗欠缺自信，表現不能接受；歐戰過後，預計又會回復最強陣容出擊，拉舒福特仍會先掛帥，左閘勞基梳爾、中場卡斯米路亦有機會擔正。球王基斯坦奴朗拿度繼續在聯賽出任後備。

愛華頓　　受傷：賓葛菲特（後衛）、賀基迪（後衛）、耶利文拿（後衛）、安祖斯唐辛（中場）、尼敦柏達臣（後衛）　　停賽：／　　曼聯　　受傷：哈利馬古尼（後衛）、華拉尼（後衛）　　停賽：／　　近況　　愛華頓現時防線仍有不少傷兵，但中前場人腳齊整，新兵又融入下，表現漸入佳境；聯賽4連和後錄得連勝，包括剛戰作客以2比1打敗修咸頓；今場面對強敵曼聯，憑主場會踢出強橫鬥志，對賽又不輸蝕，有力保不敗。曼聯上仗聯賽被同市宿敵曼城蹂躪，聯賽4連勝告終，士氣大受打擊；雖說該隊在歐戰不會全力出擊，但始終大軍部份球員舟車勞頓，今場續戰作客要贏不易，寧撐主隊。

往績　　雙方近3次聯賽交手，愛華頓1勝2和；上次勝1比0。